ஈரானின் தெற்குப் பகுதியில் உள்ள பார்ஸ் மாகாணத்தில் 200 பில்லியன் கன மீட்டருக்கும் அதிகமான இயற்கை எரிவாயு இருப்பு கண்டறியப்பட்டுள்ளதாக ஈரான் அரசு அறிவித்துள்ளது. இதில் சுமார் 160 பில்லியன் கன மீட்டர் எரிவாயுவை பிரித்தெடுக்க முடியும் என அந்நாட்டின் பெட்ரோலியத்துறை அமைச்சர் மொஹ்சென் பக்நெஜாத் தெரிவித்தார். இந்த எரிவாயுவில் ஹைட்ரஜன் சல்பைடு அளவு குறைவாக இருப்பதால், இதனை மேம்படுத்துவதற்கும் இயக்குவதற்கும் ஆகும் செலவு குறையும் என்று அவர் குறிப்பிட்டார்.
இருப்பினும், இந்த புதிய எரிவாயு வயலில் இருந்து உற்பத்தி தொடங்குவதற்கு இன்னும் பல ஆண்டுகள் ஆகும் என்று தகவல்கள் தெரிவிக்கின்றன. பிப்ரவரி மாத இறுதியில் தொடங்கிய மோதல்களால் ஈரானின் எரிசக்தி உள்கட்டமைப்புகள் மற்றும் எண்ணெய் கிடங்குகள் மீது தாக்குதல்கள் நடத்தப்பட்டு வரும் சூழலில், இந்த புதிய எரிவாயு கண்டுபிடிப்பு முக்கியத்துவம் பெறுகிறது.
