உலக வெப்பமயமாதலுக்கு முக்கியக் காரணமாக விளங்கும் கார்பன் டைஆக்சைடு (CO₂) உமிழ்வில் சீனா, அமெரிக்கா மற்றும் இந்தியா ஆகிய நாடுகள் முன்னணியில் உள்ளன. வேர்ல்ட் பாப்புலேஷன் ரிவியூ தரவுகளின்படி, 2024-ஆம் ஆண்டில் சீனாவின் CO₂ உமிழ்வு 13,125 மெகா டன்னாகப் பதிவாகியுள்ளது, இது உலகளாவிய அளவில் 33.12 சதவீதமாகும். அமெரிக்கா இரண்டாவது இடத்திலும், 3,154 மெகா டன் உமிழ்வுடன் இந்தியா மூன்றாவது இடத்திலும் உள்ளன.
இந்தியாவின் மொத்த உமிழ்வு அதிகமாக இருந்தாலும், தனிநபர் உமிழ்வு அளவு 2.19 டன் மட்டுமே என்பது குறிப்பிடத்தக்கது. இது அமெரிக்கா மற்றும் ரஷ்யா போன்ற நாடுகளை விடக் கணிசமாகக் குறைவு. ரஷ்யா, ஜப்பான், ஈரான் மற்றும் இந்தோனேசியா ஆகிய நாடுகள் அடுத்தடுத்த இடங்களில் உள்ளன. புதைபடிவ எரிபொருட்களின் பயன்பாடு மற்றும் தொழிற்சாலைகளின் வளர்ச்சியே இந்த உமிழ்வு அதிகரிப்புக்கு முக்கியக் காரணங்களாகக் கருதப்படுகின்றன.
காலநிலை மாற்றத்தின் தாக்கத்தால் பனிப்பாறைகள் உருகுதல், கடல் மட்டம் உயர்தல் மற்றும் தீவிர வானிலை நிகழ்வுகள் உலகெங்கும் அதிகரித்து வருகின்றன. இதனை எதிர்கொள்ள புதுப்பிக்கத்தக்க ஆற்றல் பயன்பாட்டை அதிகரிப்பதும், தூய்மையான தொழில்நுட்பங்களுக்கு மாறுவதும் அவசியமாகும். கார்பன் உமிழ்வைக் குறைப்பது என்பது உலக நாடுகளின் கூட்டுப் பொறுப்பு என வலியுறுத்தப்பட்டுள்ளது.
