தமிழக அரசுப் பேருந்துகளில் பெண்கள் இலவசமாகப் பயணிக்கும் 'வெற்றிப் பயணம்' திட்டத்தை ரத்து செய்யக் கோரி சென்னை உயர் நீதிமன்றத்தில் வழக்கு தொடரப்பட்டுள்ளது. ஈரோட்டைச் சேர்ந்த தனியார் பேருந்து உரிமையாளர் கலாமணி தாக்கல் செய்துள்ள இந்த மனு, தலைமை நீதிபதி எஸ்.ஏ.தர்மாதிகாரி மற்றும் நீதிபதி ஜி.அருள்முருகன் அடங்கிய அமர்வில் இன்று விசாரணைக்கு வருகிறது.
கடந்த அக்டோபர் 2-ம் தேதி முதல்வர் விஜய் தொடங்கி வைத்த இத்திட்டத்தால், தனியார் பேருந்து உரிமையாளர்களுக்குக் கடுமையான நிதி இழப்பு ஏற்படுவதாக மனுதாரர் குறிப்பிட்டுள்ளார். மேலும், முறையான அரசாணை இன்றி இத்திட்டம் செயல்படுத்தப்படுவதாகவும், இது அரசியல் சாசனத்தின் சம உரிமைக்கு எதிரானது என்றும் அவர் தனது மனுவில் தெரிவித்துள்ளார்.
இந்தத் திட்டத்தைச் சட்டவிரோதமானது என அறிவிக்க வேண்டும் என்றும், வழக்கின் இறுதித் தீர்ப்பு வரும் வரை இத்திட்டத்தைச் செயல்படுத்த இடைக்காலத் தடை விதிக்க வேண்டும் என்றும் மனுவில் கோரப்பட்டுள்ளது. மாநிலம் முழுவதும் 12,600-க்கும் மேற்பட்ட அரசுப் பேருந்துகளில் பெண்கள் கட்டணமின்றி பயணிக்கும் வகையில் இத்திட்டம் தற்போது நடைமுறையில் உள்ளது.
