புதுடெல்லி: தலைமைத் தேர்தல் ஆணையர் ஞானேஷ் குமார் பதவி விலகும் வரை தங்களது போராட்டம் தொடரும் என்று மக்களவை எதிர்க்கட்சித் தலைவர் ராகுல் காந்தி தெரிவித்துள்ளார்.
வாக்காளர் பட்டியல் சிறப்பு தீவிர திருத்தம் (SIR) மற்றும் தேர்தல் ஆணையத்தின் செயல்பாடுகள் தொடர்பாக எதிர்க்கட்சிகள் பல்வேறு குற்றச்சாட்டுகளை முன்வைத்து வருகின்றன. குறிப்பாக வாக்காளர் பட்டியலில் பெயர்கள் நீக்கப்படுவது உள்ளிட்ட விவகாரங்களில் முறைகேடுகள் நடைபெற்றுள்ளதாக எதிர்க்கட்சிகள் குற்றம்சாட்டுகின்றன. இந்தக் குற்றச்சாட்டுகளை தேர்தல் ஆணையமும் மத்திய அரசும் மறுத்து வருகின்றன.
இந்த நிலையில், தலைமைத் தேர்தல் ஆணையர் ஞானேஷ் குமார் பதவி விலக வேண்டும் என வலியுறுத்தி ராகுல் காந்தி உள்ளிட்ட எதிர்க்கட்சித் தலைவர்கள் டெல்லியில் போராட்டத்தில் ஈடுபட்டனர். போராட்டத்தின்போது ராகுல் காந்தி உள்ளிட்ட பல எதிர்க்கட்சி எம்.பி.க்கள் போலீசாரால் தடுத்து நிறுத்தப்பட்டு காவலில் எடுக்கப்பட்டனர்.
இதற்கிடையே தனது நிலைப்பாட்டை மேலும் தீவிரமாக வெளிப்படுத்தியுள்ள ராகுல் காந்தி, “ஞானேஷ் குமார் பதவி விலகும் வரை எங்களது போராட்டம் நிற்காது. இது நாட்டின் மிகப் புனிதமான ஒன்றைப் பாதுகாப்பதற்கான போராட்டம். நரேந்திர மோடியும் அமித் ஷாவும் எங்களைத் தடுத்து நிறுத்த முடியாது” என்று தெரிவித்துள்ளார்.
தேர்தல் நடைமுறையின் நம்பகத்தன்மை மற்றும் ஜனநாயகத்தைப் பாதுகாப்பதற்கான போராட்டமாக இதனை எதிர்க்கட்சிகள் முன்னிறுத்துகின்றன.
மறுபுறம், எதிர்க்கட்சிகளின் குற்றச்சாட்டுகளை பாஜக நிராகரித்துள்ளது. தேர்தல் தோல்விகளுக்குத் தேர்தல் ஆணையத்தைக் குற்றம்சாட்டுவதாக காங்கிரஸை பாஜக விமர்சித்துள்ளது.
தேர்தல் ஆணையமும் வாக்காளர் பட்டியல் திருத்த நடவடிக்கைகளுக்கு அரசியல் நோக்கம் இல்லை என்றும், தகுதியற்ற மற்றும் நகல் பதிவுகளை நீக்கி தகுதியான வாக்காளர்களை பட்டியலில் உறுதி செய்வதே நோக்கம் என்றும் கூறியுள்ளது.
இதனால் தலைமைத் தேர்தல் ஆணையர் ஞானேஷ் குமாரை மையமாகக் கொண்ட எதிர்க்கட்சிகளின் போராட்டம் தேசிய அரசியலில் முக்கிய விவகாரமாக உருவெடுத்துள்ளது.
