சன்ரைசர்ஸ் ஹைதராபாத் அணியின் இணை உரிமையாளர் காவ்யா மாறன் மற்றும் இசையமைப்பாளர் அனிருத் ரவிச்சந்தர் ஆகியோருக்கு நவம்பர் மாதம் திருமணம் நடைபெறவுள்ளது. இவர்களது திருமண வரவேற்பு விழா நவம்பர் 21-ம் தேதி சென்னையில் நடைபெறவிருக்கும் நிலையில், இதற்கான அழைப்பிதழ்களை சன் குழுமத் தலைவர் கலாநிதி மாறன் மற்றும் அவரது மனைவி காவேரி மாறன் ஆகியோர் முக்கிய அரசியல் தலைவர்களுக்கு நேரில் சென்று வழங்கி வருகின்றனர்.
பிரதமர் நரேந்திர மோடி, தெலங்கானா முதலமைச்சர் ஏ. ரேவந்த் ரெட்டி மற்றும் தமிழக முதலமைச்சர் சி. ஜோசப் விஜய் ஆகியோருக்கு இந்த வரவேற்பு விழாவில் பங்கேற்க அழைப்பு விடுக்கப்பட்டுள்ளது.
பிரதமர் மோடியை சந்தித்து அழைப்பிதழ் வழங்கியபோது, கலாநிதி மாறன், காவேரி மாறன் ஆகியோருடன் அனிருத்தின் பெற்றோர்களான நடிகர் ரவி ராகவேந்திரா மற்றும் லட்சுமி ரவிச்சந்தர் ஆகியோரும் உடனிருந்தனர். அதேபோல், தமிழக முதலமைச்சர் சி. ஜோசப் விஜய் என்று சந்திப்பின்போது அனிருத்தும் உடன் இருந்தார். தெலங்கானா முதலமைச்சர் ஏ.ரேவந்த் ரெட்டியை அவரது ஜூப்ளி ஹில்ஸ் இல்லத்தில் கலாநிதி மாறன் தம்பதியினர் சந்தித்து அழைப்பிதழ் வழங்கியதை, தெலங்கானா முதலமைச்சர் அலுவலகம் தனது எக்ஸ் (X) தளத்தில் அதிகாரப்பூர்வமாக உறுதிப்படுத்தியுள்ளது. அந்தப் பதிவில், 'சன் குழுமத் தலைவர் கலாநிதி மாறன் மற்றும் அவரது மனைவி காவேரி மாறன் ஆகியோர் முதலமைச்சர் ஏ. ரேவந்த் ரெட்டியை சந்தித்து, தங்கள் மகள் காவ்யா மாறனின் திருமண வரவேற்பு விழாவிற்கு அழைப்பு விடுத்தனர்' என்று தெரிவிக்கப்பட்டுள்ளது.
சென்னையில் நவம்பர் 21-ம் தேதி வரவேற்பு விழா நடைபெறும் என்பது உறுதி செய்யப்பட்டாலும், நவம்பர் 11-ம் தேதி கிரீஸில் திருமணம் நடைபெறவுள்ளதாக வெளியாகும் தகவல்களைத் தம்பதியினர் இன்னும் உறுதிப்படுத்தவில்லை. கடந்த காலங்களில் காவ்யா மாறன் மற்றும் அனிருத் இடையிலான உறவு குறித்து சமூக வலைதளங்களில் வதந்திகள் பரவியபோது, அனிருத் அவற்றை மறுத்திருந்தார்.
கடந்த 2025 ஜூன் மாதம் இது குறித்துப் பதிவிட்ட அவர், 'திருமணமா? தயவுசெய்து வதந்திகளைப் பரப்புவதை நிறுத்துங்கள்' என்று குறிப்பிட்டிருந்தார். தற்போது தெலங்கானா முதலமைச்சர் அலுவலகத்தின் அதிகாரப்பூர்வ அறிவிப்பு மூலம், நீண்டகாலமாக நிலவி வந்த ஊகங்களுக்கு முற்றுப்புள்ளி வைக்கப்பட்டுள்ளது.
சன் குழுமத்தின் ஐபிஎல் அணியான சன்ரைசர்ஸ் ஹைதராபாத்தின் முகமாக அறியப்படுபவர் காவ்யா மாறன். அதேபோல், இந்தியத் திரையுலகின் முன்னணி இசையமைப்பாளராக அனிருத் திகழ்கிறார். இவர்களது திருமண வரவேற்பு விழா அரசியல், சினிமா மற்றும் விளையாட்டுத் துறையைச் சேர்ந்த முக்கியப் பிரமுகர்கள் பங்கேற்கும் நிகழ்வாக அமையும் என்று எதிர்பார்க்கப்படுகிறது.
