சென்னையில் செய்தியாளர்களைச் சந்தித்த திமுக எம். பி. ஆ.
ராசா, தமிழகத்தில் சமீபத்தில் கைப்பற்றப்பட்ட மெத்தம்பெட்டமைன் போதைப்பொருள் விவகாரம் குறித்துக் கடுமையான விமர்சனங்களை முன்வைத்தார். சுமார் 135 கிலோ மெத்தம்பெட்டமைன் போதைப்பொருள் பறிமுதல் செய்யப்பட்டிருப்பது மிகவும் தீவிரமான விவகாரம் என்று குறிப்பிட்ட அவர், இதன் சர்வதேச மதிப்பு 800 கோடி முதல் 1,000 கோடி ரூபாய் வரை இருக்கலாம் எனக் குறிப்பிட்டார்.
"தமிழகம் போதைப்பொருள் கடத்தலுக்கான மையமாக மாறியிருக்கிறதா என்ற கேள்வி எழுகிறது" என்று அவர் தெரிவித்தார். மேலும், இந்த மெத்தம்பெட்டமைன் போதைப்பொருள் பயங்கரவாதச் செயல்கள், சர்வதேச ஆயுதக் கடத்தல் மற்றும் எல்லை தாண்டிய பயங்கரவாதச் செயல்களுடன் தொடர்புடையதாக இருக்கலாம் என்றும் அவர் எச்சரித்தார். போதைப்பொருள் ஒழிப்புக்காக 65 குழுக்களை அமைத்துள்ளதாகக் கூறும் தவெக அரசு, உளவுத்துறை இருந்தும் இவ்வளவு பெரிய கடத்தலைத் தடுக்கத் தவறியது ஏன் என்று ஆ.
ராசா கேள்வி எழுப்பினார். "வெறும் ரீல்ஸ்களில் தங்களை நல்லவர்களாகச் சித்தரித்துக்கொள்வது போதாது; மக்கள் உண்மையான நடவடிக்கையை எதிர்பார்க்கிறார்கள்" என்று அவர் சாடினார். தவெக நிர்வாகிகளின் பெயர்களைக் குறிப்பிட்டு, "எங்களுடன் யாராவது புகைப்படம் எடுத்துக்கொண்டால் அதை வைத்து அரசியல் செய்யும் நீங்கள், உங்கள் கட்சியின் அதிகாரப்பூர்வப் பொறுப்பாளர்கள் போதைப்பொருள் வழக்குகளில் சிக்கியிருப்பதற்கு என்ன பதில் சொல்லப்போகிறீர்கள்?
" என்று அவர் வினவினார். ஈரோட்டைச் சேர்ந்த அருணன் (140 கிலோ குட்கா), வேதாரண்யம் வடக்கு ஒன்றியச் செயலாளர் அருண்பாண்டியன் (120 கிலோ கஞ்சா), மற்றும் பூபதி ராஜா (12 கிலோ போதைப்பொருள்) ஆகியோரின் பெயர்களை அவர் சுட்டிக்காட்டினார். எஸ்ஐஆர் (SIR) விவகாரத்தில் திமுக மீது முன்வைக்கப்படும் குற்றச்சாட்டுகளுக்குப் பதிலளித்த ஆ.
ராசா, இந்த விவகாரத்தில் திமுகவின் நிலைப்பாடு தொடக்கத்திலிருந்தே உறுதியாக இருப்பதாகத் தெரிவித்தார். நாடாளுமன்றத்திற்கு உள்ளேயும் வெளியேயும் திமுக தொடர்ந்து எதிர்ப்பு தெரிவித்து வருவதையும், இது தொடர்பாக மாநில முதலமைச்சர்களுக்குக் கடிதம் எழுதியதையும் அவர் நினைவுபடுத்தினார். மேலும், காங்கிரஸ் உள்ளிட்ட கட்சிகள் திமுக மீது முன்வைக்கும் குற்றச்சாட்டுகளுக்குத் தார்மீக உரிமை இல்லை என்றும் அவர் குறிப்பிட்டார்.
