செவ்வாய்க் கிரகத்தின் மர்மமான நிலவுகளை ஆய்வு செய்து, அங்கிருந்து மண் மற்றும் பாறை மாதிரிகளை பூமிக்குக் கொண்டு வரும் நோக்கில், ஜப்பான் விண்வெளி ஆய்வு நிறுவனம் (JAXA) ஒரு புதிய விண்வெளிப் பயணத்தைத் தொடங்கியுள்ளது. செவ்வாயின் நிலவுகளை ஆய்வு செய்ய மேற்கொள்ளப்படும் உலகின் முதல் முயற்சி இதுவாகும். ஜப்பானின் தனகாஷிமா தீவில் உள்ள விண்வெளி ஏவுதளத்திலிருந்து, செவ்வாய்க்கிழமை அதிகாலை இந்த விண்கலம் விண்ணில் செலுத்தப்பட்டது.
'மார்ஷியன் மூன்ஸ் எக்ஸ்ப்ளோரேஷன்' (MMX) என்று பெயரிடப்பட்டுள்ள இந்தத் திட்டத்திற்காக, உலகின் ஐந்து முக்கிய விண்வெளி ஆராய்ச்சி நிறுவனங்கள் ஒன்றிணைந்துள்ளன. சுமார் 578 மில்லியன் டாலர் மதிப்பிலான இந்தத் திட்டம், ஐந்து ஆண்டுகள் நீடிக்கும் என்று எதிர்பார்க்கப்படுகிறது. செவ்வாயின் இரண்டு நிலவுகளில் பெரியதான 'போபோஸ்' (Phobos) மீது ஒரு ரோபோடிக் ஆய்வுக்கருவி மற்றும் ஒரு சிறிய ரோவரைத் தரையிறக்குவதே இந்தத் திட்டத்தின் முக்கிய இலக்காகும்.
இந்த விண்கலம் அடுத்த ஆண்டு கோடை காலத்திற்குள் செவ்வாயின் சுற்றுப்பாதையைச் சென்றடையும். அங்கு சென்றடைந்ததும், பிரான்ஸ் மற்றும் ஜெர்மனி இணைந்து உருவாக்கிய 'ஐடெஃபிக்ஸ்' (Idefix) என்ற சிறிய ரோவர், போபோஸ் நிலவின் மேற்பரப்பில் தரையிறக்கப்படும். மைக்ரோவேவ் ஓவன் அளவே உள்ள இந்த நான்கு சக்கர ரோவர், போபோஸின் மிகக் குறைந்த ஈர்ப்பு விசையில் சுமார் 100 நாட்கள் ஆய்வு மேற்கொள்ளும்.
இது ஒரு 'பாதுகாப்பு வழிகாட்டியாக' செயல்பட்டு, விண்கலம் தரையிறங்குவதற்கு ஏற்ற பாதுகாப்பான இடத்தைக் கண்டறிய உதவும். இதன்பின், விண்கலம் போபோஸில் தரையிறங்கி, துளையிட்டு குறைந்தது 10 கிராம் மண் மற்றும் பாறை மாதிரிகளைச் சேகரிக்கும். இந்த மாதிரிகள் 2031-ம் ஆண்டு ஆஸ்திரேலிய பாலைவனத்தில் தரையிறக்கப்படும் என்று திட்டமிடப்பட்டுள்ளது.
இந்தத் திட்டம் குறித்து நாசாவின் வானியற்பியல் நிபுணர் டாம் ஸ்டாட்லர் கூறுகையில், 'இது மிகுந்த உற்சாகத்தையும், வியப்பையும் அளிக்கும் ஒரு தருணம்' என்று தெரிவித்தார். ஜெர்மனி விண்வெளி நிறுவனத்தின் ரோவர் பிரிவுத் தலைவர் மார்கஸ் கிரெபென்ஸ்டைன் இது குறித்துக் குறிப்பிடுகையில், 'இது வாழ்நாளில் ஒருமுறை மட்டுமே கிடைக்கக்கூடிய வாய்ப்பு.
செவ்வாய் மண்டலத்திலிருந்து மாதிரிகளைத் திரும்பக் கொண்டு வரும் முதல் திட்டத்தில் நாமும் ஒரு அங்கமாக இருக்கிறோம்' என்று கூறினார். போபோஸ் மற்றும் டீமோஸ் ஆகிய நிலவுகள், செவ்வாய் கிரகத்தின் ஈர்ப்பு விசையால் ஈர்க்கப்பட்ட சிறுகோள்களா அல்லது செவ்வாயுடன் விண்கற்கள் மோதியதால் உருவானவையா என்பதை அறிவதே இந்த ஆய்வின் முக்கிய நோக்கம்.
இந்த மாதிரிகள் கோள்களின் உருவாக்கம் மற்றும் உயிரினங்கள் வாழ்ந்ததற்கான சாத்தியக்கூறுகள் குறித்த புதிய தகவல்களை வெளிப்படுத்தும் என்று விஞ்ஞானிகள் நம்புகின்றனர். ஜப்பான் இந்தத் திட்டத்திற்காக 350 மில்லியன் டாலர்களை முதலீடு செய்துள்ளது. இதனுடன் நாசா 87 மில்லியன் டாலர், பிரான்ஸ் விண்வெளி நிறுவனம் 68 மில்லியன் டாலர், ஜெர்மனி விண்வெளி நிறுவனம் 56 மில்லியன் டாலர் மற்றும் ஐரோப்பிய விண்வெளி நிறுவனம் 17 மில்லியன் டாலர் எனப் பங்களித்துள்ளன.
