வரும் வெள்ளிக்கிழமை (ஆகஸ்ட் 23) புதிய காற்றழுத்த தாழ்வு பகுதி உருவாகி புயலாக மாற வாய்ப்புள்ளதாக சென்னை வானிலை ஆய்வு மைய இயக்குநர் துரை தெரிவித்துள்ளார். தற்போதைய கணிப்பின்படி, இந்த புயலால் தமிழகத்திற்கு பெரிய பாதிப்புகள் ஏற்பட வாய்ப்பு குறைவு என அவர் குறிப்பிட்டார். அக்டோபர் மாதத்தை விட நவம்பர் மாதத்தில் புயல் சின்னங்கள் உருவாவதும், மழைப்பொழிவு வழக்கத்தை விட அதிகமாக இருப்பதும் இயல்பான ஒன்று என அவர் மேலும் தெரிவித்தார்.
இதனிடையே, தென்மேற்கு வங்கக்கடலில் நிலவும் காற்றழுத்த தாழ்வு பகுதி காரணமாக, நெல்லை, தூத்துக்குடி மற்றும் கன்னியாகுமரி மாவட்டங்களில் இன்று கன முதல் மிக கனமழை பெய்யக்கூடும் என வானிலை மையம் எச்சரித்துள்ளது. நீலகிரி, கோவை, ஈரோடு, திருப்பூர், தேனி, மதுரை உள்ளிட்ட பல மாவட்டங்களில் கனமழை பெய்ய வாய்ப்புள்ளதாக தெரிவிக்கப்பட்டுள்ளது.
நாளை தூத்துக்குடி, நெல்லை, கன்னியாகுமரி, தென்காசி, விருதுநகர், ராமநாதபுரம், தேனி, திண்டுக்கல், மதுரை, கோவை, நீலகிரி உள்ளிட்ட மாவட்டங்களுக்கு மிக கனமழைக்கான ஆரஞ்சு அலர்ட் விடுக்கப்பட்டுள்ளது. சென்னையை பொறுத்தவரை, இன்றும் நாளையும் வானம் மேகமூட்டத்துடன் காணப்படும் என்றும், நகரின் சில பகுதிகளில் இடி மின்னலுடன் கூடிய மிதமான மழை பெய்யக்கூடும் என்றும் வானிலை ஆய்வு மையம் அறிவித்துள்ளது.
