கர்நாடகாவில் வாக்காளர் பட்டியலில் இருந்து பெயர்களை நீக்குவதற்காக, தேர்தல் அதிகாரிகள் முறையான காரணங்கள் ஏதுமின்றி 61,000-க்கும் மேற்பட்ட 'படிவம் 7' விண்ணப்பங்களைச் சமர்ப்பித்துள்ளது சர்ச்சையை ஏற்படுத்தியுள்ளது. வாக்காளர் பட்டியலில் பெயர் நீக்கம் கோரும் விண்ணப்பங்களில், அதற்கான காரணத்தைக் குறிப்பிடுவது '1960-ஆம் ஆண்டு வாக்காளர் பதிவு விதிகளின்படி' கட்டாயமாகும்.
ஆனால், தேர்தல் பதிவு அதிகாரிகள் மற்றும் உதவி தேர்தல் பதிவு அதிகாரிகள் தாக்கல் செய்த விண்ணப்பங்களில் இந்த விவரங்கள் பூர்த்தி செய்யப்படாமல் காலியாக விடப்பட்டுள்ளன. இது, அந்த காலகட்டத்தில் பெறப்பட்ட மொத்த விண்ணப்பங்களில் மூன்றில் ஒரு பங்காகும். செப்டம்பர் 23-ஆம் தேதியுடன் கோரிக்கைகள் மற்றும் ஆட்சேபனைகளுக்கான காலக்கெடு முடிந்த பிறகும், விண்ணப்பங்கள் சமர்ப்பிக்கப்பட்டது குறிப்பிடத்தக்கது.
செப்டம்பர் 24 முதல் அக்டோபர் 22 வரை ஆயிரக்கணக்கான விண்ணப்பங்கள் தாக்கல் செய்யப்பட்டுள்ளன. குறிப்பாக, இறுதி நாளான அக்டோபர் 22 அன்று மட்டும் 10,105 விண்ணப்பங்கள் சமர்ப்பிக்கப்பட்டுள்ளன. இதில் பொம்மனஹள்ளி சட்டமன்றத் தொகுதியில் மட்டும் 5,757 விண்ணப்பங்கள் பெறப்பட்ட நிலையில், அதில் 4,095 விண்ணப்பங்களை அதிகாரிகளே தாக்கல் செய்துள்ளனர்.
இடம் மாறியவர்கள், இறந்தவர்கள், வயது வராதவர்கள் மற்றும் ஒரே பெயரில் உள்ள நகல் பதிவுகள் குறித்த தரவுகளின் அடிப்படையில் இந்த விண்ணப்பங்கள் தானாகவே உருவாக்கப்பட்டதாக அதிகாரிகள் தரப்பில் விளக்கம் அளிக்கப்பட்டுள்ளது. இருப்பினும், விண்ணப்பங்களில் முறையான காரணங்கள் குறிப்பிடப்படாதது, பெயர் நீக்கத்தின் நம்பகத்தன்மை குறித்து கேள்விகளை எழுப்பியுள்ளது.
மாதிரி ஆய்வுகளின்படி, காலக்கெடு முடிந்த பிறகும் சில பெயர்கள் வாக்காளர் பட்டியலில் இருந்து நீக்கப்பட்டிருப்பது கண்டறியப்பட்டுள்ளது. பாதிக்கப்பட்ட வாக்காளர்களுக்கு இது குறித்து முறையான அறிவிப்புகள் வழங்கப்பட்டதா என்பது இன்னும் தெளிவாகத் தெரியவில்லை.
