இந்திய பங்குச்சந்தை இந்த ஆண்டு கடும் சரிவைச் சந்தித்து வருகிறது. பிஎஸ்இ (BSE) பட்டியலில் உள்ள நிறுவனங்களின் சந்தை மதிப்பு சுமார் ரூ. 30 லட்சம் கோடி அளவுக்கு சரிந்துள்ளது.
இந்த வீழ்ச்சியின் வேகத்தைப் பார்க்கும்போது, 2008-ஆம் ஆண்டு உலகளாவிய நிதி நெருக்கடிக்குப் பிறகு, இந்திய பங்குச்சந்தை சந்திக்கும் மிக மோசமான ஆண்டாக இது அமையக்கூடும் என்று சந்தை நிபுணர்கள் அச்சம் தெரிவிக்கின்றனர். புளூம்பெர்க் அறிக்கையின்படி, இந்தோனேசியாவைத் தவிர்த்துப் பார்த்தால், இந்த ஆண்டு உலக அளவில் மோசமான செயல்பாட்டைக் கொண்ட சந்தையாக இந்தியா உருவெடுத்துள்ளது.
நிஃப்டி 50 குறியீடு இந்த ஆண்டில் இதுவரை சுமார் 14 சதவீதம் சரிந்துள்ளது. கடந்த 18 ஆண்டுகளில் இல்லாத அளவுக்கு இது மிக மோசமான சரிவாகும். வெளிநாட்டு நிறுவன முதலீட்டாளர்கள் (FIIs) இந்த ஆண்டில் இதுவரை சுமார் 32 பில்லியன் டாலர், அதாவது ரூ.
3 லட்சம் கோடிக்கும் அதிகமான தொகையை இந்திய சந்தையிலிருந்து திரும்பப் பெற்றுள்ளனர். இந்தத் தொடர் வெளியேற்றம் பங்கு விலைகளில் பெரும் அழுத்தத்தை ஏற்படுத்தியுள்ளது. நிஃப்டி 50 குறியீட்டில் உள்ள 50 நிறுவனங்களில் 38 நிறுவனங்களின் பங்குகள் சரிவைச் சந்தித்துள்ளன.
இதில் ஐடிசி (36%), மாருதி சுஸுகி (34%), ஜியோ பைனான்சியல் சர்வீசஸ் மற்றும் ஹெச்டிஎஃப்சி லைஃப் இன்சூரன்ஸ் (தலா 31%), ஹெச்டிஎஃப்சி வங்கி (30%) ஆகியவை குறிப்பிடத்தக்க சரிவைச் சந்தித்துள்ளன. மிட்கேப் மற்றும் ஸ்மால்கேப் பங்குகளும் கடும் விற்பனை அழுத்தத்திற்கு உள்ளாகியுள்ளன. நிஃப்டி மிட்கேப் 100 குறியீடு இந்த ஆண்டு சுமார் 8 சதவீதம் சரிந்துள்ளது.
கேபிஐடி டெக்னாலஜிஸ் (54%), ஆதித்யா பிர்லா ஃபேஷன் அண்ட் ரீடெய்ல் (50%), பிபி ஃபின்டெக் (44%) உள்ளிட்ட பங்குகள் மிட்கேப் பிரிவில் பெரும் சரிவைச் சந்தித்துள்ளன. ஸ்மால்கேப் பிரிவில் கேஇசி இன்டர்நேஷனல் (56%), ஐநாக்ஸ் விண்ட் (52%), ஜூபிடர் வேகன்ஸ் (49%) ஆகிய பங்குகள் சரிந்துள்ளன. அக்டோபர் 1 முதல் 15 வரையிலான காலகட்டத்தில் மட்டும் வெளிநாட்டு போர்ட்ஃபோலியோ முதலீட்டாளர்கள் (FPIs) ரூ.
47,955 கோடியை இந்திய சந்தையிலிருந்து திரும்பப் பெற்றுள்ளனர். இந்த முதலீட்டு வெளியேற்றத்திற்கு வரி உயர்வு, நாணய மதிப்பு மாற்றம் மற்றும் வரி பொறுப்புகள் குறித்த நிச்சயமற்ற தன்மை ஆகியவை முக்கிய காரணங்களாகக் கருதப்படுகின்றன. இது குறித்து ஜியோட்டஸ்.
காம் (Giottus. com) நிறுவனத்தின் தலைமைச் செயல் அதிகாரி விக்ரம் சுப்புராஜ் கூறுகையில், 'இந்தியா அதிக வரிகள் மூலம் பங்கு முதலீட்டை அதிக செலவு மிக்கதாக மாற்றியுள்ளது' என்று தெரிவித்தார். ஜூலை 2024-இல் தாக்கல் செய்யப்பட்ட மத்திய பட்ஜெட்டில், நீண்டகால மூலதன ஆதாய வரி (LTCG) 10 சதவீதத்திலிருந்து 12.
5 சதவீதமாகவும், குறுகிய கால மூலதன ஆதாய வரி (STCG) 15 சதவீதத்திலிருந்து 20 சதவீதமாகவும் உயர்த்தப்பட்டது. இது முதலீட்டாளர்களின் லாபத்தை நேரடியாகப் பாதித்துள்ளது. மேலும், டாலருக்கு நிகரான ரூபாய் மதிப்பு சரிவு மற்றும் வரி விதிப்பு நடைமுறைகளில் உள்ள தெளிவற்ற தன்மைகளும் வெளிநாட்டு முதலீட்டாளர்களைக் கவலையடையச் செய்துள்ளன.
அக்டோபர் 15 நிலவரப்படி, வெளிநாட்டு முதலீட்டாளர்கள் ரூ. 65. 94 லட்சம் கோடி மதிப்பிலான பங்குகளைக் கொண்டுள்ளனர்.
விக்ரம் சுப்புராஜ் மேலும் கூறுகையில், 'குறைந்த வரி விகிதங்கள் மட்டுமே இந்தச் சிக்கல்களைத் தீர்த்துவிடாது. நிதி மறுசீரமைப்பு மற்றும் வரி பொறுப்புகளைத் தீர்ப்பதற்கான நம்பகமான செயல்முறைகள் குறித்து அரசு பரிசீலிக்க வேண்டும்' என்று வலியுறுத்தினார்.
