டெல்லியில் நவம்பர் 1-ம் தேதி இந்தியா கூட்டணி சார்பில் நடைபெறவுள்ள பிரம்மாண்ட பேரணியைத் தீபாவளி பண்டிகைக்குப் பிறகு ஒத்திவைக்க வேண்டும் என்று வர்த்தகர்கள் சங்கம் மீண்டும் வலியுறுத்தியுள்ளது. இது தொடர்பாக காங்கிரஸ் தலைவர் ராகுல் காந்திக்கு, வர்த்தக மற்றும் தொழில்துறை கூட்டமைப்பின் (CTI) தலைவர் பிரிஜேஷ் கோயல் விரிவான கடிதம் ஒன்றை எழுதியுள்ளார்.
இந்த கடிதத்தின் நகல் காங்கிரஸ் தலைவர் மல்லிகார்ஜுன கார்கேவுக்கும் அனுப்பப்பட்டுள்ளது. டெல்லியின் ராம்லீலா மைதானத்தில் நடைபெறவுள்ள இந்த பேரணியில் சுமார் 10 லட்சம் பேர் பங்கேற்பார்கள் என்று எதிர்பார்க்கப்படுகிறது. தீபாவளி பண்டிகை காலத்தின் உச்சகட்ட விற்பனை நேரத்தில் இந்த பேரணி நடைபெறுவது, வர்த்தகத்தைப் பாதிக்கும் என்று வர்த்தகர்கள் கவலை தெரிவித்துள்ளனர்.
முன்னதாக, இந்த பேரணியை ஒத்திவைக்க வேண்டும் என்ற கோரிக்கையை ராகுல் காந்தி நிராகரித்திருந்தார். இது குறித்து சமூக வலைதளத்தில் கருத்து தெரிவித்திருந்த ராகுல் காந்தி, பிரதமர் மோடி தலைமை தேர்தல் ஆணையர் கியான்ேஷ் குமாரை பதவி நீக்கம் செய்தால், 30 வினாடிகளில் போராட்டத்தை நிறுத்திவிட முடியும் என்று குறிப்பிட்டிருந்தார். மேலும், டெல்லி வர்த்தகர்களிடம் பேசிய அவர், "நாங்கள் உங்களை நேசிக்கிறோம், உங்கள் குறைகளைக் கேட்கிறோம்.
அரசு மெட்ரோவை மூடியது, சாலைகளை அடைத்தது, தலைநகரை முடக்கியது. வாக்கு திருடப்படும்போது, உங்கள் கடை, சேமிப்பு, குழந்தைகளின் எதிர்காலம் என எதுவும் பாதுகாப்பாக இருக்காது. மோடியிடம் கூறுங்கள் - குற்றஞ்சாட்டப்பட்ட எண் 4, கியான்ேஷ் குமாரை நீக்குங்கள், 30 வினாடிகளில் போராட்டம் நின்றுவிடும்" என்று பதிவிட்டிருந்தார்.
ராகுல் காந்தியின் இந்த கருத்தைத் தொடர்ந்து, ராம்லீலா மைதானத்தைச் சுற்றியுள்ள 20 முக்கிய சந்தைகளின் வர்த்தகர்கள் கடும் அதிருப்தி அடைந்துள்ளனர். பேரணியின் போது சுமார் 15,000 முதல் 20,000 பேருந்துகள் மற்றும் ஆயிரக்கணக்கான வாகனங்கள் டெல்லிக்குள் நுழையும் என்பதால், போக்குவரத்து நெரிசல் ஏற்பட்டு சந்தைகள் முடங்கும் என்று அவர்கள் அஞ்சுகின்றனர்.
குறிப்பாக சாந்தினி சௌக், பகீரத் பேலஸ், காரி பௌலி, சதார் பஜார், சாவ்ரி பஜார், காஷ்மீரி கேட், நபி கரீம் மற்றும் கரோல் பாக் உள்ளிட்ட முக்கிய சந்தைகள் பாதிக்கப்படும் என்று வர்த்தகர்கள் சுட்டிக்காட்டியுள்ளனர். கடந்த அக்டோபர் 10-ம் தேதி ஜந்தர் மந்தரில் 3,000 முதல் 4,000 பேர் பங்கேற்ற போராட்டமே மத்திய டெல்லியை முடக்கி, வர்த்தகர்களுக்கு ரூ.
3,000 கோடி இழப்பை ஏற்படுத்தியதாக சி. டி. ஐ தெரிவித்துள்ளது.
இந்நிலையில், 10 லட்சம் பேர் பங்கேற்கும் பேரணி நடைபெற்றால், பழைய டெல்லியின் ஒட்டுமொத்த வர்த்தகமும் பாதிக்கப்பட்டு ரூ. 10,000 கோடி இழப்பு ஏற்படும் என்று அவர்கள் எச்சரித்துள்ளனர். பேரணியை ஒத்திவைக்க முடியாத பட்சத்தில், சந்தைப் பகுதிகளைப் பாதிக்காத வகையில் புராடி மைதானம் அல்லது ஜவஹர்லால் நேரு மைதானம் போன்ற இடங்களுக்கு மாற்ற வேண்டும் என்றும் வர்த்தகர்கள் கோரிக்கை விடுத்துள்ளனர்.
