ஐடிபிஐ வங்கியைத் தனியார்மயமாக்கும் மத்திய அரசின் நடவடிக்கைக்கு எதிர்ப்பு தெரிவித்து ராகுல் காந்தி வெளியிட்ட கருத்துக்கு, மத்திய நிதியமைச்சர் நிர்மலா சீதாராமன் பதிலடி கொடுத்துள்ளார். காங்கிரஸ் ஆட்சிக் காலத்தில் ஐடிபிஐ வங்கி செல்வாக்கு மிக்கவர்களுக்குக் கடன் வழங்கக் கட்டாயப்படுத்தப்பட்டதால் பெரும் இழப்பைச் சந்தித்ததாக அவர் குற்றம்சாட்டியுள்ளார். காங்கிரஸ் தலைவர்களுடன் நெருங்கிய தொடர்புடைய வணிகக் குழுக்களுக்கு வழங்கப்பட்ட கடன்கள் வாராக்கடன்களாக மாறியதே வங்கியின் வீழ்ச்சிக்குக் காரணம் என அவர் குறிப்பிட்டார்.
தற்போதைய அரசு ரூ.25,000 கோடிக்கும் அதிகமான முதலீட்டைச் செய்து, தொழில்முறை அணுகுமுறையைக் கையாண்டதன் மூலம் ஐடிபிஐ வங்கி மீட்டெடுக்கப்பட்டுள்ளதாக நிர்மலா சீதாராமன் தெரிவித்தார். வங்கி மறுசீரமைப்பு நடவடிக்கைகளில் அனைத்துச் சட்டப்பூர்வ நடைமுறைகளும் முறையாகப் பின்பற்றப்பட்டுள்ளதாக அவர் உறுதிபடக் கூறினார். மேலும், பிப்ரவரி 2024-ல் வெளியிடப்பட்ட இந்தியப் பொருளாதாரம் குறித்த வெள்ளை அறிக்கையில் உள்ள தகவல்கள் இப்போதும் பொருத்தமானவை என அவர் சுட்டிக்காட்டினார்.
காங்கிரஸ் ஆட்சிக் காலத்தில் செல்வாக்கு மிக்கவர்களுக்கு முன்னுரிமை அளிக்கப்பட்டதாகவும், தற்போது சாதாரண மக்கள் எளிதாகக் கடன் பெறும் சூழல் உருவாகியுள்ளதாகவும் அவர் தெரிவித்தார். வங்கி அதிகாரிகளுக்கு அழுத்தம் கொடுக்கும் தொலைபேசி அழைப்புகள் தற்போது இல்லை எனக் குறிப்பிட்ட நிர்மலா சீதாராமன், ரஃபேல் விவகாரத்தில் ராகுல் காந்தி கூறிய பொய்கள் அம்பலமானது போல, இந்த விவகாரத்திலும் உண்மை வெளிப்படும் எனத் தெரிவித்துள்ளார்.
