மெர்சிடிஸ்-பென்ஸ் இந்தியா நிறுவனம் தனது புதிய ஜிஎல்சி 400 4மேட்டிக் (GLC 400 4MATIC) மின்சார எஸ்யூவி ரக காரை இந்தியாவில் அறிமுகப்படுத்தியுள்ளது. இதன் எக்ஸ்-ஷோரூம் விலை 78.50 லட்சம் ரூபாயாக நிர்ணயிக்கப்பட்டுள்ளது. புனே அருகே உள்ள சாகன் தொழிற்சாலையில் உள்நாட்டிலேயே தயாரிக்கப்படும் இந்த வாகனங்களுக்கான விநியோகம், வரும் 2026 நவம்பர் மாதம் மத்தியில் தொடங்கும் என அறிவிக்கப்பட்டுள்ளது.
இந்த எஸ்யூவி, 360 கிலோவாட் திறன் மற்றும் 800 என்எம் டார்க் வழங்கும் இரட்டை மோட்டார் ஆல்-வீல்-டிரைவ் வசதியைக் கொண்டுள்ளது. இது 0 முதல் 100 கி.மீ வேகத்தை வெறும் 4.3 வினாடிகளில் எட்டும் திறன் கொண்டது. 94 கிலோவாட்-மணிநேர பேட்டரி பொருத்தப்பட்டுள்ள இந்த கார், ஒருமுறை முழுமையாக சார்ஜ் செய்தால் 711 கி.மீ வரை செல்லும் (WLTP தரநிலைப்படி) என நிறுவனம் தெரிவித்துள்ளது. மேலும், 800-வோல்ட் டிசி ஃபாஸ்ட் சார்ஜிங் வசதி மூலம், 10 நிமிட சார்ஜிங்கில் 303 கி.மீ தூரம் வரை பயணிக்க முடியும்.
புதிய மெர்சிடிஸ்-பென்ஸ் இயங்குதளத்துடன் கூடிய 39.1 அங்குல எம்பி-யு-எக்ஸ் (MBUX) ஹைப்பர்ஸ்கிரீன் இதில் முக்கிய தொழில்நுட்ப அம்சமாக உள்ளது. இந்த அறிமுகத்திற்காக மெர்சிடிஸ்-பென்ஸ் இந்தியா நிறுவனம் தனது உற்பத்தி செயல்பாடுகளில் கூடுதலாக 200 கோடி ரூபாய் முதலீடு செய்துள்ளது. வாடிக்கையாளர்கள் தங்களுக்குத் தேவையான ஹோம் வால்பாக்ஸ் சார்ஜிங் வசதிக்கு மாற்றாக, எம்பி.சார்ஜ் (MB.CHARGE) பொது சார்ஜிங் கிரெடிட்களைத் தேர்வு செய்யும் வசதியும் வழங்கப்பட்டுள்ளது.
