பலி எண்ணிக்கை 82 ஆக உயர்வு

அசாம் மாநிலத்தில் பெய்து வரும் கனமழை மற்றும் வெள்ளத்தால் உயிரிழந்தவர்களின் எண்ணிக்கை 82 ஆக உயர்ந்துள்ளது. சிவசாகர் மற்றும் சாரைதேவ் மாவட்டங்களில் தலா ஒருவர் உயிரிழந்ததை அடுத்து இந்த எண்ணிக்கை அதிகரித்துள்ளதாக மாநில அரசு தெரிவித்துள்ளது. சிவசாகர், கோலாகாட், ஜோர்ஹாட், நாகான் மற்றும் சாரைதேவ் ஆகிய ஐந்து மாவட்டங்களில் சுமார் 1,92,799 பேர் வெள்ளத்தால் பாதிக்கப்பட்டுள்ளனர். வெள்ள பாதிப்பு குறைந்து வரும் நிலையில், 54 நிவாரண முகாம்களில் 13,000 பேர் தங்கியுள்ளனர். திக்ஹோவ் மற்றும் தான்சிரி ஆறுகளில் நீர்மட்டம் அபாய அளவைத் தாண்டி ஓடுவதால், தேசிய மற்றும் மாநில பேரிடர் மீட்புப் படையினர் தொடர்ந்து கண்காணிப்புப் பணிகளில் ஈடுபட்டு வருகின்றனர். பாதிக்கப்பட்ட பகுதிகளில் சேத மதிப்பீடுகளை விரைந்து முடித்து, நிவாரண நிதியை விடுவிக்க அரசு முன்னுரிமை அளித்து வருகிறது. இதற்கிடையில், மின்சாரத் துறையின் மூலம் 9,289 பயனாளிகளுக்கு 41.67 கோடி ரூபாய் மானியத்தை செவ்வாய்க்கிழமைக்குள் வழங்க அதிகாரிகளுக்கு உத்தரவிடப்பட்டுள்ளது. மேலும், வெள்ளத்தால் கடுமையாக பாதிக்கப்பட்ட நான்கு மாவட்டங்களில் உள்ள மக்களுக்கு ஆறு மாத கால கடன் தவணை ஒத்திவைப்பு வழங்கப்பட்டுள்ளது. இது தொடர்பான காப்பீட்டுத் தீர்வுகள் மற்றும் கடன் சலுகைகள் குறித்து விவாதிக்க, காப்பீட்டு நிறுவனங்கள் மற்றும் நிதி நிறுவனங்களுடன் ஆகஸ்ட் 5-ம் தேதி ஆலோசனை நடத்தப்படும் என முதலமைச்சர் ஹிமந்த பிஸ்வா சர்மா அறிவித்துள்ளார்.