புக்கெட்டில் இருந்து டெல்லி நோக்கிச் சென்ற ஏர் இந்தியா விமானம் திடீரென 300 அடி உயரத்தில் இருந்து கீழே இறங்கிய சம்பவத்தைத் தொடர்ந்து, அந்த விமானத்தின் விமானி இரண்டு முறை நடத்தப்பட்ட போதைப்பொருள் சோதனையில் தோல்வியடைந்துள்ளார். கடந்த ஆகஸ்ட் 4-ம் தேதி நடந்த இந்த விபத்தில், விமானத்தில் இருந்த 20 பயணிகள் மற்றும் 4 பணியாளர்கள் காயமடைந்தனர். சோதனையில் விமானியின் உடலில் கஞ்சா கலந்திருப்பது உறுதி செய்யப்பட்டுள்ளதாகத் தகவல்கள் தெரிவிக்கின்றன.
விமானம் திடீரென உயரத்தை இழந்தபோது, விமானி தனது இருக்கையில் இல்லை என்றும், துணை விமானியே விமானத்தைக் கட்டுப்படுத்தியதாகவும் கூறப்படுகிறது. இந்தச் சம்பவம் குறித்து ஏர் கிராஃப்ட் ஆக்சிடென்ட் இன்வெஸ்டிகேஷன் பியூரோ (AAIB) விரிவான விசாரணை நடத்தி வருகிறது. தொழில்நுட்பக் கோளாறுகள் மற்றும் மனிதத் தவறுகள் குறித்து விசாரணை நடைபெற்று வருவதால், சம்பந்தப்பட்ட இரண்டு விமானிகளும் பணியிலிருந்து நீக்கப்பட்டுள்ளனர்.
விமானப் பாதுகாப்புக்கு அரசு முன்னுரிமை அளிப்பதாகவும், இந்த விவகாரத்தை மிகவும் தீவிரமாகக் கையாள்வதாகவும் மத்திய சிவில் விமானப் போக்குவரத்துத் துறை அமைச்சர் ராம் மோகன் நாயுடு தெரிவித்துள்ளார். விமானத்தின் தரவுகள் மற்றும் மருத்துவ அறிக்கைகளை முழுமையாக ஆய்வு செய்த பின்னரே, விபத்துக்கான காரணம் குறித்து இறுதி முடிவு எடுக்கப்படும் என அவர் கூறினார்.
