ஹார்முஸ் நீரிணையில் இருந்த அனைத்து கண்ணிவெடிகளும் வெற்றிகரமாக அகற்றப்பட்டுவிட்டதாக அல்லது செயலிழக்கச் செய்யப்பட்டுவிட்டதாக அமெரிக்க அதிபர் டொனால்ட் டிரம்ப் அறிவித்துள்ளார். அமெரிக்க கடற்படையின் தகவல்களை மேற்கோள் காட்டி பேசிய அவர், சர்வதேச கடல் வழித்தடமான இந்தப் பகுதியில் மீண்டும் கண்ணிவெடிகளை வைக்கும் கப்பல்கள் உடனடியாக அழிக்கப்படும் என கடுமையான எச்சரிக்கை விடுத்துள்ளார். அமெரிக்க விண்வெளிப் படை உள்ளிட்ட ராணுவத் திறன்களைக் கொண்டு இப்பகுதியையும், நாடன்ஸ் அருகே உள்ள நிலத்தடி ஈரான் அணுசக்தி மையம் போன்ற முக்கிய உள்கட்டமைப்புகளையும் தொடர்ந்து கண்காணித்து வருவதாகவும் அவர் தெரிவித்தார்.
இதனிடையே, ஈரான் மீதான பொருளாதாரத் தடைகளை அமெரிக்கா மேலும் தீவிரப்படுத்தியுள்ளது. ஈரான் ஆட்சியை நிதி ரீதியாக தனிமைப்படுத்தும் நோக்கில் இந்த நடவடிக்கைகள் எடுக்கப்பட்டுள்ளன. இருப்பினும், அமெரிக்காவின் இந்த பொருளாதாரத் தடைகளை ஈரான் அதிகாரிகள் நிராகரித்துள்ளனர். இந்தத் தடைகளை எதிர்கொள்வதற்காக இரண்டு ஆண்டுகால செயல்பாட்டுத் திட்டத்தை தாங்கள் ஏற்கனவே உருவாக்கி வைத்துள்ளதாக ஈரான் தரப்பில் தெரிவிக்கப்பட்டுள்ளது.
