வரும் செப்டம்பர் 12 மற்றும் 13 ஆகிய தேதிகளில் புது தில்லியில் நடைபெறவுள்ள 18-வது பிரிக்ஸ் உச்சி மாநாட்டில் பங்கேற்க சீன அதிபர் ஷி ஜின்பிங் இந்தியா வருகிறார். பிரதமர் நரேந்திர மோடியின் அழைப்பை ஏற்று அவர் இந்த பயணத்தை மேற்கொள்கிறார். கடந்த ஏழு ஆண்டுகளில் சீன அதிபர் இந்தியா வருவது இதுவே முதல் முறையாகும்.
இந்த பயணத்தின்போது சுமார் 400 அதிகாரிகள் கொண்ட பெரிய தூதுக்குழுவினருடன் ஷி ஜின்பிங் வருகிறார். இது 2019-ம் ஆண்டு அவர் இந்தியா வந்தபோது இருந்த குழுவை விட இரு மடங்கு அதிகம் என்பது குறிப்பிடத்தக்கது. பிரிக்ஸ் ஒத்துழைப்புக்கு பெய்ஜிங் அதிக முக்கியத்துவம் அளிப்பதாகவும், தற்போதைய மாநாட்டின் தலைவராக இந்தியா செயல்படுவதை சீனா ஆதரிப்பதாகவும் சீன வெளியுறவு அமைச்சகம் தெரிவித்துள்ளது.
எல்லைப் பகுதிகளில் நிலவும் பதற்றங்களுக்கு மத்தியில், இரு நாடுகளுக்கும் இடையிலான உறவை சீரமைக்க உயர்மட்ட தூதரக முயற்சிகள் மேற்கொள்ளப்பட்டு வருகின்றன. சமீபத்தில் பெய்ஜிங்கில் தேசிய பாதுகாப்பு ஆலோசகர் அஜித் தோவல் மற்றும் சீன துணை அதிபர் ஹான் ஜெங் ஆகியோர் நடத்திய பேச்சுவார்த்தையில், எல்லைப் பகுதியில் அமைதியை நிலைநாட்டுவது மற்றும் இருதரப்பு உறவுகளை வலுப்படுத்துவது குறித்து விவாதிக்கப்பட்டது.
