கோவையைச் சேர்ந்த வித்யா ராம்ராஜ், இன்று இந்திய தடகளத்தின் முக்கிய நட்சத்திரங்களில் ஒருவர். ஆனால் இந்த வெற்றிக்குப் பின்னால் சாதாரண குடும்பத்தின் மிகப்பெரிய போராட்டம் இருக்கிறது.
வித்யாவின் தந்தை ராம்ராஜ், குடும்பத்தைக் காப்பாற்ற நீண்ட நேரம் வாகனம் ஓட்டி உழைத்தவர். தாய் மீனா இல்லத்தரசி. வித்யாவுக்கு நித்யா என்ற இரட்டைச் சகோதரி உள்ளார்; அவரும் தேசிய அளவிலான தடகள வீராங்கனை. இவர்களுக்கு சத்யா என்ற மூத்த சகோதரியும் உள்ளார்.
குடும்பத்தின் பொருளாதார சூழல் கடினமாக இருந்தபோதும், மகள்களின் விளையாட்டுத் திறனை உணர்ந்த தாய் மீனா, வித்யா மற்றும் நித்யாவை ஈரோட்டில் உள்ள விளையாட்டு விடுதியில் சேர்த்தார். அந்த முடிவுதான் இருவரின் வாழ்க்கையையும் மாற்றியது.
வித்யா, ஈரோட்டிலுள்ள Kongu Arts and Science College-ல் 2016–2019 காலகட்டத்தில் விளையாட்டு உதவித்தொகையுடன் BBA படித்தார். பின்னர் தேசிய பயிற்சி முகாமில் இணைந்து தனது தடகளப் பயணத்தை அடுத்த கட்டத்திற்கு எடுத்துச் சென்றார். தற்போது அவர் இந்திய ரயில்வேயில் பணியாற்றுகிறார்.
2023 ஆசிய விளையாட்டில் 400 மீட்டர் தடை ஓட்டத்தில் 55.42 விநாடிகள் பதிவு செய்து பி.டி.உஷாவின் தேசிய சாதனையை சமன் செய்த வித்யா, 2026 நகோயாவில் 54.75 விநாடிகளில் ஓடி அந்த 42 ஆண்டுகால சாதனையை முறியடித்து வெண்கலம் வென்றார். 2026 ஆசிய விளையாட்டில் 400 மீட்டர் தங்கம், 400 மீட்டர் தடை ஓட்ட வெண்கலம், கலப்பு 4x400 மீட்டர் ரிலே வெள்ளி, மகளிர் 4x400 மீட்டர் ரிலே தங்கம் என பதக்கங்களை குவித்து இந்தியாவுக்கு பெருமை சேர்த்துள்ளார்.
ஒருகாலத்தில் தனது மகள்களின் கனவுக்காக ஓய்வின்றி வாகனம் ஓட்டிய தந்தை; மகள்களின் திறமையை நம்பி விளையாட்டு விடுதிக்கு அனுப்பிய தாய்; தனது வருமானத்திலிருந்து வித்யாவின் பயிற்சிக்கு உதவிய இரட்டைச் சகோதரி நித்யா — இவர்களின் ஆதரவுடன் இன்று ஆசிய அரங்கில் இந்தியக் கொடியை உயர்த்தியிருக்கிறார் கோவைப் பெண் வித்யா ராம்ராஜ்.
