2024-25 நிதியாண்டின் இறுதியில், பிரதமர் குடிமக்கள் உதவி மற்றும் அவசரகால நிவாரண நிதி (பிஎம் கேர்ஸ்) ரூ.8,452 கோடி கையிருப்புடன் உள்ளது. தணிக்கை அறிக்கைகளின்படி, இந்த நிதியாண்டில் ரூ.470 கோடிக்கும் மேல் வட்டியாக ஈட்டப்பட்ட நிலையில், 'பிஎம் கேர்ஸ் ஃபார் சில்ட்ரன்' திட்டத்திற்காக ரூ.87 லட்சம் மட்டுமே செலவிடப்பட்டுள்ளது.
இந்த நிதியின் பெரும் பகுதியான ரூ.6,641 கோடி நிலையான வைப்பு நிதிகளாக (Fixed Deposits) வைக்கப்பட்டுள்ளன. 2020 மார்ச் மாதம் பொது அறக்கட்டளையாகத் தொடங்கப்பட்ட இந்த நிதியில், 2024-25 நிதியாண்டில் உள்நாட்டு நன்கொடையாக ரூ.479 கோடியும், வெளிநாட்டு பங்களிப்பாக ரூ.92 லட்சமும் பெறப்பட்டுள்ளன.
பிரதமரை தலைவராகவும், பாதுகாப்பு, உள்துறை மற்றும் நிதி அமைச்சர்களை அறங்காவலர்களாகவும் கொண்ட இந்த அறக்கட்டளை, அவசரகால தேவைகளுக்காக உருவாக்கப்பட்டது. இதனிடையே, நிதியின் ஆதாரங்கள் குறித்த வெளிப்படைத்தன்மை இல்லாமை, செயல்படுத்தும் முகமைகளிடமிருந்து பெறப்பட்ட ரூ.324 கோடி திரும்பப் பெறப்பட்டதற்கான விளக்கம் மற்றும் நிதிநிலை அறிக்கைகளில் விரிவான குறிப்புகள் இல்லாதது குறித்து அஞ்சலி பரத்வாஜ் உள்ளிட்ட தகவல் உரிமை ஆர்வலர்கள் விமர்சனங்களை எழுப்பியுள்ளனர்.
